رئيس بلدية سعدنايل ينفي اي ظهور مسلح في البلدة
الحنان _
عقد رئيس بلدية سعدنايل حسين الشوباصي مؤتمرا صحفيا في دار البلدية تناول فيه ما اشيع حول ظهور مسلح في سعدنايل امس.
وقال صرلنا شهر بلبنان بحالة ثورة بكل المناطق بدون استثناء ثورة وطنية بكل معنى الكلمة صرلنا شهر بالثورة وصرلن شهر يحاولوا يشوهوا إسم سعدنايل،
مرة بإسم الخوات.. ومرة بإسم طلب الهويات.. ومرة بإسم الإعتداء على الناس.. وأخيرا طلعولنا بخبرية انتشار المسلحين بالضيعة.
أنا بدي إنفي هالكلام جملة وتفصيلا وبدي أكد أنه لم يسجل أي حضور مسلح ابدا ابدا ابدا، وهيدا اتهام خطير ومغرض ومشبوه، وهيدا الحكي بأكده الجيش والقوى الأمنية كافة يلي ما عم تفارق الضيعة لا بالليل ولا بالنهار.
هناك من يحاول الهروب من مطالب الناس المحقة الى التخويف بالحرب. هناك من أزعجته وطنية الثورة ويحاول إيقاظ النعرات الطائفية ويريد اخراجها من رحاب الوطن الى زواريب المذهبية.
سعدنايل ما فيها سلاح الا سلاح الرجولة والوطنية والكرامة.
الشباب يلي ناشطين بهيدي الثورة مطالبهم هي نفس مطالب اهل زحلة وأهل الهرمل وبيروت والنبطية وطرابلس وجل الديب وصور وعاليه وبعلبك مطالب معيشية اقتصادية 3 أرباعهم قاعدين بلا شغل خريجين وعمال ومزارعين وطلاب خايفين من المستقبل والأكيد لما يتسكر الطريق بسعدنايل متل كل طرقات لبنان هيدا التسكير مش موجه ضد منطقة ولا ضد طائفة ولا ضد حدا بل هيدا تضامن مع بقية المناطق وانسجام وانصهار مع كل الوطن، فالوجع واحد والفساد ما عندو طائفية والسرقة والنهب عم تصيب كل الناس.
وبخصوص الاتهامات نحنا عم نحضر ملف حتى نقدم شكوى للقضاء بكل من زج اسم سعدنايل في ادعاءات كاذبة ومسيئة وهيدي عينة من الصور يلي عم تنشر عأساس انها بسعدنايل هي في مناطق اخرى إنما تستخدم لمحاولة الإساءة للبلدة.
نحنا بسعدنايل سلاحنا وقوتنا وحامينا هو سلاح الدولة سلاح الجيش والقوى الأمنية.
ونحنا أهل الدولة وأبنائها عنا رموز بالدولة منشوف حالنا فيهن العميد خالد حمود والعقيد عاصم الشحيمي وغيرهم)، ضباط وأفراد الجيش هم أهلنا وأخوتنا وأبنائنا وصرلنا شهر والحمد الله ما صار ولا تصادم واحد مع الجيش يلي موجود على مدار الساعة بالقرب من المتظاهرين، والجيش حريص عليهم وهم حريصين على الجيش فهو رمز وحدة لبنان ورمز الدولة والمؤسسات.
وكمان بدي أذكر القوى السياسية بالمناطق المجاورة يلي تعاونوا معنى لتفادي أية إشكال وأي فتنة.
وأخيرا بدي أطلب من المسؤولين انهم يشفقوا على هالشعب وعلى هالجيش وينزلوا من عليائهم ويتواضعوا شوي ويألفو حكومة تعطي شوية أمل لهالشعب المسكين.
