لقاء رئيس الهيئة العليا للاغاثة مع المزارعين في البقاع الاوسط
إلتقى رئيس الهيئة العليا للإغاثة اللواء خير مع رئيس تجمع المزارعين ابراهيم الترشيشي بحضور النواب جورج عقيص و أنور جمعة وعدد من المزارعين في البقاع الأوسط في مركز النقابة في رياق بعد جولة للنائب عقيص والترشيشي على الاضرار في المنطقة.
الخير إستمع الى المزارعين حول الأضرار التي لحقت بهم وبدوره الترشيشي شرح الوضع القائم بعد السيول التي حصلت وقال:
مصيبتنا اليوم كبيرة، وليست عامة.. ما فينا نقول انو كل المزارعين متضررين؛ الضرر مش شامل ولا عمومي هو في اماكن محددة. فبدنا نقول لحضرتك ان نحن هلق بالبقاع حالياً المزارعين على آخر الموسم وحاليا كلو كان ناطر فرصة بس لحتى يصرّف الإنتاج بعيد عن البضاعة المهربة وإغراق الاسواق فيها وبعيد عن شحار وتعتير يلي نحن فيه.
صارت معنا هالكارثة فعلاً كنا بنتمنى توصل على الارض وتكشف معنا.. شوفات بحياتنا مش شايفينها!
كمية الامطار التي نزلت 50 ملم نزلت بأقل من ساعتين بالعادة بالبقاع 50 ملم بتروح معنا شهر ثلاثة اشهر بسنة الماضية والمناطق اللي صابتها البردة جرّدتها نهائيا من المحصول وما بقى يستوعبوا لا ليرة ولا بربع ولا بنص لذلك نحن بحاجة الى لجان لحتى تكشف ولحتى تشوف من هو المتضرر ومن الذي يستفيد من هذا الضرر لذلك نحن نشدد يكون هناك لجان من قبل الجيش وتكون اللجنة مدروسة لحتى تعطي للكل حقوقهم هذا الذي بدنا ياه.
بدوره اللواء خير قال:انا بعرف تماما باللبوة وعرسال ومحيط هذه المنطقة تعرضت لأوضاع وعواصف أمنية وطبيعية ومرقت فيها بعدة مراحل والحمدلله مرقت. ان كان في بعض الأحيان بنساعد وبعض الأحيان ما كنا نساعد وإعتمدتوا على سواعدكم.. بصراحة مبارح كان في عنا كم مشروع ببرالياس ونهر الليطاني و في قب الياس وكمان كنا بالفاعور؛ مشاريع زغيرة مش على مستوى كبير فكلفني دولة الرئيس سعد الحريري بالإطلاع والكشف عليها ولنشوف بعينا وننقل لدولة الرئيس الحريري الحقيقة متل ماهي على الأرض وفوراً كانت التوجهات لدولة الرئيس الحريري وكل الإدارات الرسمية التحرك الفوري على الأرض واكيد بمساعدة فعاليات والنواب الموجودين معنا. والآلية التي يجب أن تتبع بدنا رئيس البلدية يكون صادق ويعطي رقم العقار ورقم تلفونه ويبعتلنا على السريع ونحن بنوجهها دغري للجيش فورا وقديش يلحقوا يكشفوا هيدي النقطة تبعيتنا نخلص من الكشف؛ الجيش الذي يحدد الإغاثة.والأساس الذي يهمنا بالأضرار هي البيوت والمحلات وإن شاء الله رح نساعد فيها وإن الأراضي الزراعية تأتي بمرحلة ثانية فورية.
